Район тарихы

Питрәч районы  матур табигате, тирән сулы Мишә елгасы, хәтфә үләнле болыннары, урман-күлләре, тырыш, эш сөючән   халкы белән үзенә тартып тора.

IX –XIII гасырларда хәзерге Питрәч районы территориясе Болгар ханлыгы составына кергән. Монгол яулап алучыларына буйсынырга теләмичә Болгар дәүләте халкы төньякка, Казансу һәм Мишә елгасы ярларына күченеп китә. Шулай итеп, ХIII гасыр ахыры  XIV гасыр башында Мишә елгасының югары өлешендә Тау-Тирмән, Янсуар, кебек авыллар барлыкка килә. Шулай ук Казан ханлыгы картасында Чыты, Пановка, Татар Тау Иле, Колай, Питрәч һ.б. авылларны  таба алабыз.

Питрәч районы – Казан яны төбәкләренең берсе. Татарстанның төньяк-көнбатышына урнашкан. Ул Лаеш, Биектау, Арча, Теләче, Балык Бистәсе районнары белән чикләшә.

Районның гомуми мәйданы 1358 квадрат километр.

Питрәч районы,  ВЦИК карары белән, 1930 елның  10 августында оештырыла. 26 нчы августта Питрәчтә беренче партия коференциясе уздырыла. Анда 36 делегат катнаша. 30 августта район Советының беренче съезды чакырыла. Анда 100 делегат катнаша.

Район үзәге – Питрәч (Пестрецы) авылы. Бу исем турында 2 төрле караш бар. Беренчесе: имештер бу төбәктә ”пестрец” дигән гөмбә үскән, авыл халкы аны Казанга илтеп сата торган булган. Базарда аларны “пестрецлар”дип йөрткәннәр, соңрак бу кушамат авыл исеменә әверелә. Икенчесе: авылга күп төрле һөнәрчеләр нигез салганнар. Алар ”пестрые” дип йөртелгәннәр. Шуннан авылны да Пестрецы дип атаганнар. ”Чуар” дигән сүздән алынган булып чыга.

Питрәчтә төрле милләт халыклары яши, барлыгы 37087 кеше. Күпчелеген татарлар һәм руслар тәшкил итә. Татарлар - 54%, руслар- 44%, ә башка милләт вәкилләре - 2%. Район үзәгендә 9 меңнән артык кеше яши.

Питрәч җирләрен сугарып Мишә, Сула, Үшнә һәм Норма елгалары ага. Үшнә - Нормага, Норма - Мишәгә кушыла. Мишә исә Лаеш янында Камага коя. Мишә елгасы буенда шаулап нарат урманы үсә. Урманнары төрле җиләк – җимешләргә, гөмбәләргә бай. Кара җирле, уңдырышлы туфрагында игеннәр күкрәп үсә.

 

Обновлено 28.05.2018 13:20
Copyright © 2003-2018
Хата таптыгызмы? Сүзне яки җөмләне билгеләгез һәм CTRL+ENTER басыгыз
Яндекс цитирования