Пановкада яңа табиб амбулаториясе булачак
Пановка авылында яңа модульле табиблык амбулаториясен төзү төгәлләнеп килә.
Аны төзү эшләре бу язда башланды һәм республика программасы нигезендә алып барыла. Авыл җирлекләрендә халыкка беренчел медик-санитар ярдәм күрсәтүне камилләштерү программасына старт Татарстан Президенты Рөстәм Миңнеханов инициативасы белән бирелде. Пановкада яңа амбулатория төзү өчен республика бюджетыннан якынча унике миллион сум акча бүлеп бирелгән.
- Яңа табиблык амбулаториясендә сменага утыз кешене кабул итү планлаштырыла. Анда участок терапевты, участок табибының шәфкать туташы һәм Питрәчтән киләчәк педиатр, шулай ук техник хезмәткәрләр эшләячәк. Берничә җирлеккә: Кәвәл, Кибәч, Пимәр, Юныс һәм Белкино авылларына хезмәт күрсәтергә исәп тотабыз. Пановка авылындагы амбулаториядән тыш, быел Татар Казысы авылында да яңа ФАП төзелә. Әлегә барысы да план буенча бара, билгеләнгән максатларны үтибез, - дип уртаклашты безнең белән Питрәч РҮХнең халыкка медицина хезмәте күрсәтү буенча баш табиб урынбасары Наталья Ксенофонтова.
- Барлык керү төркемнәренең әзерлеген күргәч, территорияне төзекләндерүгә керешәчәкбез, ул безнең Пановка һәм күрше җирлекләрдә яшәүчеләргә медицина хезмәтләреннән файдалану өчен мөмкин кадәр уңайлы булсын өчен кирәк, - дип вәгъдә итте Пановка авыл җирлеге башлыгы Олег Козырев.