Авыл хезмәтчәннәренә - дан һәм мактау сүзләре...

2019 елның 8 ноябре, җомга

Барлык техника басуларда эшләрне бетергәннән соң, безнең районда авыл хуҗалыгы елына йомгак ясыйлар һәм бу тармак алдынгыларын хөрмәтлиләр. Тантаналы шартларда агросәнәгать өлкәсе хезмәткәрләре котлаулар һәм лаеклы бүләкләр кабул иттеләр.

Наратлык урманындагы зур залда бу көнне чын-чынлап һөнәри туганлык, үз эшенә, үз җиренә гашыйк кешеләр җыелган иде. Болар - авыл хуҗалыгы тармагы алдынгылары һәм ветераннары, авыл хуҗалыгы предприятиеләре җитәкчеләре һәм иң яхшы хезмәткәрләре, шулай ук крестьян-фермер хуҗалыклары башлыклары һәм хезмәтчәннәре. Аларның кайберләре мондый бәйрәмдә беренче тапкыр катнашты, икенчеләре чираттагы тапкыр үзләренең югары осталыкларын расладылар. Грамоталардан һәм рәхмәтләрдән тыш, бу көнне районның авыл хуҗалыгы җитештерүенең иң яхшы хезмәткәрләре үзләренең фидакарь хезмәтләре өчен кыйммәтле бүләкләр һәм акчалата премияләр алдылар.
Татарстан Республикасы Министрлар Кабинеты боерыгы һәм Татарстан Республикасы Авыл хуҗалыгы һәм азык-төлек министрлыгының «Татарстан Республикасы агросәнәгать комплексының "Иң яхшы комбайнчысы" республика конкурсы турындагы боерыклары нигезендә  Ак Барс Питрәч «ҖЧҖ комбайнчылары Илшат Әхмәтов, Ренат Шәрәфетдинов, Илнур Фәсхетдинов, Рузил Гайнуллин һәм Рацин-Шәле ҖЧҖ комбайнчысы Илшат Мөхәммәдгалиев бүләкләнде.
Татарстан Республикасы Авыл хуҗалыгы һәм азык-төлек министрлыгының Мактау грамотасы белән «Ак Барс «Кошчылык комплексы» ҖЧҖ машина йөртүчесе Таһир Гайфуллин бүләкләнде.
Урып-җыю вакытында районның иң яхшы комбайнчылары турында сезгә сөйләдек. Алар арасында Рифкать Идиятуллин да бар. Ул «Казанский» ЗКЗ " ҖЧҖдә эшли, быел «Акрос-530» комбайнында 14 020 центнер ашлык суктырган, шуның өчен аңа район башлыгының Рәхмәт хаты һәм акчалата премия тапшырылды.
- Урып - җыю гадәти эшкә әверелде инде, - ди районның авыл хуҗалыгы тармагына 30 елга якын багышлаган тәҗрибәле комбайнчы, - басуга чыккач, бер көнгә эш планын алдан ук билгеләп куясың. Кулыңда яхшы техника булганда, кояш яктырта, хезмәтеңнең бәяләнәчәген белгәч, кәефең дә бар, эшең дә бара, - ди ул.
Кадерле укучыларыбыз, район агросәнәгать комплексының иң яхшы хезмәткәрләре белән сезне газетабызның алдагы саннарында таныштыруны дәвам итәчәкбез.

Быел бөртеклеләрнең тулай җыемы 73 614 тонна тәшкил итте, уртача уңдырышлылык гектардан 26,6 центнер. Агымдагы елның тугыз аенда 16 мең тоннадан артык сөт, 26 мең тоннага якын ит җитештерелгән, шул исәптән 24 869 тонна кош ите.