Кәвәлдә модульле фельдшер-акушерлык пункты ачылды

2023 елның 13 марты, дүшәмбе

Ул 224 кешегә хезмәт күрсәтәчәк

Бүген Кәвәл авылында модульле фельдшер-акушерлык пункты ачылды. Бина инде җылытыла, бирегә яңа медицина җиһазлары китерелгән.

- Кечкенә авыл җирлекләре өчен мондый ФАП бик мөһим. Иң мөһиме, авырмагыз, ә монда бер-берегез белән аралашу өчен генә килегез, - дип теләде Питрәч районы башлыгы Илһам Кашапов тантаналы ачылышта.

ТР сәламәтлек саклау министры Марсель Миңнуллин да авыл ФАПының беренче кунакларының берсе булды.

- Фельдшер-акушерлык пункты булганга, диспансерлаштыруның беренче этабын тыныч үткәрергә мөмкин. Мондый чаралар өлкән яшьтәге халыкның гомер озынлыгын арттырачак. Яшьләр өчен авыл җирендә калырга этәргеч булачак, - дип мөрәҗәгать итте министр халыкка.

ФАП «Сәламәтлек саклауның беренчел звеносын модернизацияләү» төбәк программасы кысаларында төзелгән. Район буенча шундый 13 медицина учреждениесе эшли.