Район ветераннарына "1941-1945 елларда Бөек Ватан сугышында Җиңүнең 80 еллыгы" юбилей медальләре тапшырылды

2025 елның 27 феврале, пәнҗешәмбе

Бүләкләрне алар Татарстан җитәкчелеге кулыннан алды

Питрәчтә Җиңүнең 80 еллыгына юбилей медальләрен тапшыру тантанасы булды. Бүләкләрне концлагерь тоткыннары – Званка авылыннан Исмаил Габидуллин, Көек авылыннан Василий Литвинов һәм Мария Чепелкина, шулай ук хезмәт фронтында катнашучылар – Күн авылыннан Халисә Нәбиуллина, Арышхазда авылыннан Екатерина Павлова һәм Дүртөйле авылыннан Нина Яковлева алды.

Махсус юбилей билгеләрен ТР Дәүләт Советы Рәисе Фәрит Мөхәммәтшин һәм Питрәч районы башлыгы Рәис Сөләйманов тапшырды. Алар ветераннарга рухи көчләре, ныклыклары, сугышчан батырлыклары һәм фидакарь хезмәтләре өчен тирән рәхмәтләрен белдерделәр.

– Аларга карата кайгыртучанлык күрсәтү һәм батырлыклары өчен рәхмәт әйтү зур әһәмияткә ия. Без үсеп килүче буынны нәкъ менә шулар үрнәгендә тәрбияләргә тиеш, - дип ассызыклады Фәрит Мөхәммәтшин.

Үзенең чыгышы ахырында ул аларга сәламәтлек теләде һәм якынлашып килүче Җиңү көне белән котлады.

Барлык ветераннар исеменнән Исмаил Габидуллин республика һәм район җитәкчелегенә игътибарлары һәм ярдәмнәре өчен рәхмәт белдерде. Ул концлагерьда үткән авыр балачагы турындагы хатирәләре белән уртаклашты:

- Без тумыштан чабата киеп үстек. Өч ел шундый шартларда яшәдек. Әни бәрәңге кабыгы алып кайтса да, без бик тә шат була идек, – дип сөйләде ул.

Чарада патриотик хәрәкәтләрдән мәктәп укучылары, шулай ук ветераннарның туганнары катнашты.