Ел саен августның икенче якшәмбесендә төзүчеләр көне билгеләп үтелә.
Татарстан Рәисе Рөстәм Нургали улы Миңнеханов һәр татарстанлының уңайлылыгын һәм иминлеген беренче урынга куя. Безнең халыкның тормышын уңайлырак итәргә нәкъ менә төзелеш комплексы хезмәткәрләре ярдәм итә.
Республика Россиядә төзелеш тармагында алдынгы урыннарда тора. 2024 ел нәтиҗәләре буенча без төзелеш күләме буенча икенче урында. Соңгы 10 елда 1500дән артык сәламәтлек саклау объекты төзелгән һәм капиталь ремонтланган. Мәгарифтә без шулай ук мәктәпләр һәм балалар бакчалары төзү һәм ремонтлау буенча да алдынгылар рәтендә. Парклар һәм ишегаллары төзекләндерелә.
Питрәч районында соңгы 5 елда 2 мәктәп һәм 1 өстәмә корпус, 4 балалар бакчасы, 2 фельдшер-акушерлык пункты һәм 2 табиб амбулаториясе, 4 парк, 1 авыл клубы, футбол манежы һәм универсаль спорт залы, шулай ук башка социаль объектлар төзелеп сафка бастырылды. Әлеге проектларны гамәлгә ашыру федераль үзәк һәм Татарстан җитәкчелеге ярдәме белән мөмкин булды.
Төзелгән объектлар - вакытның бер урында тормавының, перспектив проектларның тормышка ашырылуының һәм районның инфраструктурасы үсешенең иң яхшы күрсәткече. Хөрмәтле төзүчеләр, авыр, барыбызга да кирәкле хезмәтегез һәм һөнәри осталыгыгыз өчен рәхмәт сезгә! Ныклы сәламәтлек, яңа уңышлар һәм казанышлар, яңа проектларны гамәлгә ашыру, тотрыклылык һәм чәчәк ату сезгә!
