Сыерлар да тораклы булачак

Янсуар  авылында берьюлы ике хуҗалык төзелеш эшләре алып бара. Тиздән  “Гобәйдуллин Р.Р.” крестьян-фермер хуҗалыгының  яңа сыер абзары төзелеше төгәлләнәчәк.  Сыерлар артачагын белеп торган “Сөләйманов И.Н.”да берничә сыер абзарын торгызалар һәм рәтлиләр.

“Гобәйдуллин Р.Р.” хуҗалыгында савым  сыерларын асрау шартларын яхшырту өчен  төзүчеләр, заманча таләпләрне исәпкә алып, 250 башка сыер абзары әзерли. Монда барысы да сыерлар асрауга, кешегә эшләргә яхшы булсын өчен эшләнәчәк. Әлегә бина шартлы рәвештә секторларга бүленгән – араннар, улаклар, сөтчелек бүлекчәләре. Көн саен монда үзгәреш булып кына тора, шактый гына иркен карда да ясалган. Бик тиздән  монда терлекләр  кайтачак бит.
Янсуарның  икенче очында “Сөләйманов И.Н.”  корылмалары урнашкан. Монда эшләр киңрәк колач алган. Киләчәктә әлеге фермада 600 дән артык мөгезле эре терлек асралачак. Хуҗалыкны киңәйтүнең уңайлыгы шунда -  авыл ягыннан сыер абзарына керү  юлларын төзекләндерү. Юлга  вак таш җәелгән,   хәзер транспортка кереп-чыгып йөрүе җиңел булачак.  Хуҗалык идарәчесе Дмитрий Суриков билгеләп үткәнчә, элек язгы-көзге яңгырларда юлдан үтеп керерлек булмаган, машиналарны  фермадан еракта калдырып йөргәннәр. Ә хәзер авыл уртасыннан төзек юл уза. Әлеге яхшы үзгәрешләр авыл халкы тормышына да уңай йогынты ясый.
Очрактан файдаланып, авыл хуҗалыгы һәм азык-төлек идарәсенең җитештерү-маркетинг бүлеге башлыгы Павел Егоров белән район хуҗалыкларында терлекләрне кышкы бәйдә асрауга  әзерлек турында  сөйләшеп алдык.  Терлекләрне вакытында һәм дөрес итеп кышлатуга әзерләү бик мөһим эш. Югыйсә,  савымнар кимиячәк, терлекләр авыртачак һәм башка тискәре нәтиҗәләр булачак.
- Бүгенгә терлекчелек биналарын кышка әзерләүдә “Рацин-Шәле”, “Соя-Колай”, “Ак Барс-Питрәч” хуҗалыклары алгы сафларда бара. Әлеге хуҗалыкларда планлы дезинфекция үткәрелгән, биналар агартылган, ТСН һәм суүткәргечләргә тиешле ремонт ясалган, бозаулату бүлекләре эшкә әзерләнеп беткән,  яңа сезон режимына уңышлы гына күчкәннәр.  Башка хуҗалыклар да  кирәкле эшләрнең күп өлешен башкарганнар, - ди Павел Иванович.  – “Марс” һәм “Питрәч азык-төлек корпорациясе” хуҗалыклары  әлегә артта кала.