"Ленино-Кокушкино" музей-тыюлыгында төзекләндерү эшләре бара
XIX гасыр дворян утарын реконструкцияләү процессы белән Татарстан мәдәният министры Ирада Әюпова да танышты.
Безнең районда уникаль урын - революциянең легендар юлбашчысы Владимир Ленинның балачагы узган утары бар. Совет чорында монда, тын гына Ушнә елгасы ярында кеше күп була. Владимир Ильич ссылкада булган урында туристлар еш була.
Бүген табиб Александр Бланк утарында ремонт эшләре кайнап тора, иске биналар һәм йортлар тышкы һәм эчке яктан да ремонтлана. Административ бина төзелгән инде, аны нульдән торгызганнар, ат абзарын да яңадан торгызганнар. Тыюлык территориясендә асфальт һәм брусчатка җәелде, электр үткәрелде.
Реставрациядән соң бу усадьба туристларны җәлеп итү үзәгенә әйләнер дип планлаштырыла. Чөнки XIX гасыр мәдәниятен күп еллар дәвамында уңайлы гаилә терәге, тормыш мәшәкатьләреннән якланган, рухи тынычлык һәм иминлек символы булган утарлардан башка күз алдына да китереп булмый. Бланк утары да нәкъ менә шундый дворян оясы булган. Биредә дворян гаиләсенең көнкүреше, дәүләт һәм крестьян көнкүреше белән танышырга, дворян күңел ачу һәм крестьян ялы тарихына кагылырга мөмкин булачак. Биредә туристлар өчен кул эшләре буенча мастер-класслар, музыка уен коралларында уйнау буенча мастер-класслар оештырырга ниятлиләр.
⠀
Музей-тыюлыкта 1523 экспонат саклана, алар арасында 4 скульптура, 118 гамәли сәнгать, көнкүреш һәм этнография предметы, 144 документ, 244 фотография һәм негативлар, 803 басма продукция предметы, 181 башка экспонат бар.