Татарстан Республикасы Питрәч муниципаль районында яшәүчеләр “Урман Фест” акциясендә актив катнаштылар. Шигали авыл җирлегендә агач утырту буенча киң колачлы акция узды. Ул «Экология» милли проектын хуплап оештырылды

Агач утыртуда район башлыгы Рәис Сөләйманов катнашты.
 
"Утыртылган һәр агач - экологик иминлеккә, димәк, безнең уртак киләчәгебезгә өлеш. Агач утырту - барлык кешеләр өчен дә мөһим бурыч. Бүгенге көндә республикабыз территориясенең 17% тан артыгын урманнар алып тора. Татарстан һәм бөтен Россия Яшел булсын иде. Һәм бу безнең көчебездән килә. Бүген акциядә катнашып, һәркем бу эшкә үз өлешен кертә ала», - дип билгеләп үтте Рәис Әхтәм улы «Урман Фест» ачылышындагы чыгышында.
 
«УрманФест» та катнашучылар 100 мең нарат, тирәк һәм чыршы утырттылар.
 
«Бу урында туфрак яхшы, шуңа күрә үсеп китүчәнлек 80-90% тәшкил итәчәк. 15-20 елдан монда матур урман булыр дип өметләнәбез", - дип билгеләп үтте Матюшино урманчылыгының кишәрлек урманчысы Нурсил Гыйбадуллин.
 
Һава торышы җилле булуга карамастан, акциядә меңгә якын кеше-Казаннан һәм Питрәч районыннан хезмәт коллективлары вәкилләре катнашты. Аларга көрәкләр бирделәр, үсентеләр өләштеләр, ә эштән соң чәй эчерттеләр. Күпләр, балаларын алып, бөтен гаиләләре белән килделәр.
 
Чара табигатькә китерелгән зыянны каплау максатыннан инде 5 ел уздырыла. «Урман фест» старт алганнан бирле 75 гектар мәйданда 800 меңнән артык үсенте утыртылды.