Көек авылының «Алгоритм» технологик лицее укучысы Ибраһим Әхмәдуллин «Россиянең милли байлыгы» Бөтенроссия талантлы яшьләр конкурсында беренче урынны яулады

Ул «Технологияләр, технологик иҗат» номинациясендә чыгыш ясады. “Алгоритм” лицее директоры Лариса Глибина да диплом белән билгеләп үтелде. Ибраһим техника белән дүрт яшьтән кызыксына. Беренче сыйныфта ук ул трансмиссиянең һәм дизель двигателенең нәрсә икәнен белгән. 15 яшендә инде чын хәрби танк проектлады, аны профессиональ танкистлар бәяләде. Хәзер Ибраһимга 16 яшь. Дошман БПЛАларының Казанга һөҗүменнән соң, ул шәһәрләрне саклау өчен пилотсыз очкычлар табу комплексын эшләгән. Мәктәп укучысы өметләнгәнчә, аның эшләнмәләрен ПВО комплексларын куллану белән берлектә шәһәрне дошман һөҗүмнәреннән яклау дәрәҗәсен шактый арттырачак.