Хәзер төнлә дә якты булачак

Район авылларында чираттагы социаль программа эшли башлады. Бу юлы  уңай үзгәрешләр  урам утларына кагыла. Авыл урамнарында яктырак һәм уңайлырак булачагы турында узган ел ахырында һәм ел башында  сүз булган иде. Ул вакытта Татарстан авылларына урам утларын кире кайтару буенча яңа социаль әһәмиятле программа гамәлгә ашырылачагы турында мәгълүм булды. Моның өчен 225 миллион сум гомуми чыгым каралган. Төрле дәрәҗә бюджеттан һәр муниципаль берәмлеккә 5әр миллион сум финанслау билгеләнде. Программага 686 объект кертелде. Аларга 13,1 мең  яктырткыч, 804 идарә щиты кую планлаштырылды. Башкалар белән беррәттән безнең район авылларын да исемлеккә керттеләр. Бүгенге көндә Богородск, Колай, Шигали һәм  берничә башка җирлекләрендә төннәрен урамнарда ут яна. Бу турыда безгә әлеге авыл җирлекләре башлыклары сөйләде.

- Мондый үзгәрешләргә без сөенәбез генә, - диде Керәшен Сәрдәсе авыл җирлеге башлыгы Петр Гаврилов. Бездә  үзәк урамда, Совет урамында 5 яңа фонарь һәм щит урнаштырдылар. Әлбәттә, авыл халкы уңай үзәрешләрне шунда ук күреп алдылар. Без әлеге мәсьәләгә һәрвакыт зур игътибар бирә идек, урамнарыбызда яктылык турында даими кайгыртып торачакбыз.
Ул шулай  ук  электр энергиясен рациональ куллану максатында, торак пунктлдарда  щитлар күбрәк урнаштырылса, яхшы булыр иде дип билгеләп үтте.
Ленино-Кокушкино авыл җирлеге башлыгы Альфред Салихов та әлеге программаның уңай якларын билгеләп үтте.
- Безнең авылда яктырткычларны яңарттылар, искеләре урынына яңаларын куйдылар. Яңа лампочкалар энергияне дә азрак ала, бу шактый экономия.  Заманча лампалар бары 60Втлы,  ә искеләре 250 дән 400Втлы иде.
Төзекләндерүгә бюджеттан бүлеп бирелгән акчаларның күбесе электр энергисенә түләүгә тотыла. Шәле авылы халкы программа эше нәтиҗәләрен тулынсынча күрергә өлгермәгән әле.  Монда  куелган яктырткычларны утка тоташтырасы бар әле. Авылның иң  караңгы урыннарына куелган  20 лампочка  урамнарны яктыртып торачак монда.  Авыл җирлеге башлыгы Илшат Рифатович сүзләренә караганда, мондый зур авыл өчен бу бик аз. Шулай да уңай үзгәрешләр күз алдында. Моннан тыш ул ТатЦИК авылында 5 яңа яктырткычның эшләвен билгеләп үтте.
Төзелеш бүлеге башлыгы Рамил Шәйхетдинов биргән мәгълүмат буенча, Питрәч авыл җирлегендә фонарьләрнең  төп өлеше Гаврилов һәм Медиклар урамнарында, чиркәү һәм зират тирәләренә урнаштырылган.
- Әлеге участокта яшәүчеләрдән урам утлары турында шактый гына мөрәҗәгатьләр килде. Димәк, алар уңай үзәрешләргә сөенә генә, - диде рамил Рәшитович.  Шихазда авылында 6 яңа лампа яначак. Белгеч сүзләре буенча, әлеге программа киләсе елда да эшләячәк.