Бик яхшы эшләүчеләргә - премия

Шушы арада урак өстендә алда баручыларга акчалата премияләр, ә гаиләләренә район башлыгы Эдуард Дияров имзалаган Рәхмәт хатлары  тапшырдылар.

“Сезнең улыгыз Динар Сираҗиев, көндәлек фидакарь хезмәте белән 10 мең центнер артык бөртек суктырып алды. Һәм шулай итеп быелгы уракта алда баручыларның берсе булды. Сезгә хезмәт сөючән егет тәрбияләгән өчен зур рәхмәт!”. Һәрбер Рәхмәт хатында шушындый мактау сүзләре язылган иде.
Эшеңне матди яктан хуплау бик мөһим роль уйный. Бигрәк тә урак өсте кебек җаваплы кампания чорында. Районда, гадәттә, беренче булып 10 мең центнер суктырган комбайнчыларга премия бирәләр. Шулар арасында “Ак барс Питрәч” агрофирмасыннан Динар Сираҗиев, Альфред Хәйриев, Ирек Насыйров та бар. Нәкъ менә шушы исемлек буенча аларның өйләренә бардылар да. Делегацияне район башкарма комитеты җитәкчксе урынбасары Зимфира Мөхәммәтгәрәева җитәкләде. Механизаторлар үзләре, билгеле, кырда иде. Алар алтын башакларны урып-җыя. Рәхмәт хатларыннан тыш, ата-аналарына һәм тормыш иптәшләренә акчалата премия дә калдырып киттеләр алар.
Бу тантаналар, һичшиксез, сыздырып уйнаган гартунга кушылып җырлаулар белән үрелеп барды. Гаиләдәгеләр мондый игътибарга башта гаҗәпләнеп калды. Алар моңа бик лаек, дияр идем.
- Минем ирем комбайнда унбиш ел кырларны иңли. Улыбыз да менә унынчы сезонын аның ярдәмчесе булып тора, - ди Ирек Насыйровның хәләл җефете Рәзинә ханым. – Бу центнерлар аларга бер дә җиңел бирелми. Аны тиешенчә бәяләргә дә кирәк шул.
Рәзинә ханымның сүзләрен Альфред Хәйриевның әти-әнисе дә хуплый:
- Без аларның казанышларын белеп торабаз. Көн саен кызыксынып торабыз. Район газетасын түземсезлек белән көтеп алабыз. Андагы “Мактау такта”сында исемнәрен күргәч, сөенәбез, - ди алар.
Дилшат Сираҗиев өчен быелгы урып-җыю беренчесе әле.
- Миңа калса, эшен яхшы башкара. Кыенлыклар булмый калмый инде ул. Комбайны да ватылмый тормый. Бергәләп төзәтәбез. Аңа сезнең хатны һәм премияне бирми калмаячакбыз, билгеле. Улыбыз сынатмас дип уйлыйбыз. Комбайнчылар шундый тырыш халык инде ул. Зур рәхмәт сезгә! – диде алда баручы улының уңышына сөенгән әтисе делегацияне озатканда.