Казанда “Созвездие-Йолдызлык-2015” фестиваленең суперфиналы тәмамланды

Казанда “Созвездие-Йолдызлык-2015” Ачык республика телевизион эстрада сәнгате яшьләр фестивале суперфиналы искиткеч гала-концерт белән тәмамланган. “УНИКС” мәдәни-спорт комплексында узган концертта 1,2 һәм 3 нче урыннар өчен бүләкләр тапшырылган һәм конкурс лауреатлары махсус призлар белән бүләкләнгән. Гран-при иясе фестивальнең икенче гала-концертында – 25 нче апрельдә “Пирамида” мәдәни-күңел ачу комплексында мәгълүм булачак. Бу хакта ТР Яшьләр эшләре һәм спорт министрлыгы сайтында хәбәр ителә.

Гала-концерт ике блоктан гыйбарәт булган. Беренчесендә сугыш темасына чыгышлар тәкъдим ителгән. Икенче блокта “Мирас вокал-хореографик ансамбле “Катарина” фин халык җырын башкарып, тамашачылар күделенә үтеп кергән.

15 нче юбилей фестиваленең быелгы үзенчәлекләренең берсе – лауреатлар һәм җиңүчеләр саны 156 га кадәр арткан, чөнки һәр номинациядә жюри берничә икенче һәм өченче урыннарны билгеләгән.

Искәртеп узыйк: фестивальнең финал этаплары 13 нче апрельдән 16сына кадәр “УНИКС” та үтте. 4 көн эчендә жюри әгъзалары 4,5 меңнән артык баланың чыгышын караган. Быел фестивальгә Чиләбе, Әстерхан, Ульяновск өлкәләреннән, Удмуртия, Марий Эл Республикаларыннан, Мәскәү шәһәреннән дә катнашучылар килгән.