Чүпрәледә һәр баш терлеккә 33 центнер азык берәмлеге әзерләү максат итеп куела

Быел Чүпрәле районы маллары өчен 9031 гектардагы күпьеллык һәм 678 гектар мәйдандагы берьеллык үләннәрне җыеп аласы була. Кукуруз да быел дүрт мең гектардан артык мәйданнарда чәчелде, шулай ук катнаш азык культурасы 4500 гектар чамасы мәйданны били.

План буенча шартлы һәр баш терлеккә кимендә 33 центнер азык берәмлеге әзерләү максат итеп куела. Моның өчен 12 мең 532 тонна концентрат, 8 мең 148 тонна печән, 41905 тонна сенаж, 48 мең 890 тонна силос, 13968 тонна салам тупларга кирәк булачак. Район башлыгы җәйге чордан максималь файдаланып, 1,5 елга җитәрлек азык әзерләү бурычын куйды, дип белдерә районның “Туган як” басмасы.