Татарстан башкаласы Казанда илнең берьюлы алты шәһәрендә уза торган уникаль проектына старт бирелде

Кичә караңгыда Казанда илнең берьюлы алты шәһәрендә уза торган уникаль проектына старт бирелде.

Казан Кремленең Спас манарасында гадәти булмаган ут тамашасы башланды - 3D-mapping форматы ярдәмендә тамашачыларга яңа ел Казаны, Мәскәү, Санкт-Петербург, Сочи, Ростов-на-Дону һәм Владивосток шәһәрләренең төп тарихи урыннары күрсәтелде.

Оештыручыларның сүзләренә караганда, тамаша сценариен төзү һәм графика буенча эш ярты еллап вакытны алган.

“Барыбызга да таныш булган Спас манарасы гадәти булмаган экранга әйләнде. Үзенең зур тарихы дәвамында (манара биредә XVI гасырдан бирле тора) безнең аны мондый итеп күргән юк иде әле, - дип мөрәҗәгать итте “Казан Кремле” дәүләт тарихи-архитектура һәм сәнгать музей-тыюлыгы директоры Зилә Вәлиева тамашачыларга. – Техника зур өлеш кертте, әмма иң мөһиме – моны ясаган кешеләр. Бөтен казанлылар да аларга рәхмәтледер дип уйлыйм”.

Казан Кремленең Спас манарасы диварларындагы ут технологияләре тамашасы көн саен 31 декабрьгәчә кадәр сәгать кичке 6дан 10га кадәр куела, дип хәбәр итә Казан мэриясе матбугат хезмәте.