Гомумроссия балалар ышаныч телефоны сайтының яңартылган версиясе эшли башлады
Балалар, яшүсмерләр һәм аларның әти-әниләре өчен ышаныч телефоны – Авыр тормыш хәлендә булган балаларга ярдәм итү фондының иң мөһим проектларының берсе. Узган ел фонд үзенең унъеллыгын билгеләп үтте. Бу еллар эчендә ашыгыч психологик ярдәм хезмәте белгечләре 10,5 миллионга якын телефон мөрәҗәгате кабул иткән һәм һәр абонентка кризис вәзгыятен хәл итәргә булышкан.
Балалар ышаныч телефоны номеры: 8-800-2000-122.
Интернет-адрес: https://telefon-doveria.ru/.
2021 елның гыйнварында кулланучыларны яңартылган тышкы кыяфәт һәм навигация системасы каршы алды. Заманча интерфейс веб-ресурс структурасында яшь файдаланучыларга да, аларның ата-аналарына да җиңел ориентлашырга мөмкинлек бирәчәк. Төп биттә максатчан аудиторияләр өчен «Яшүсмерләргә» һәм «Өлкәннәргә» төймәләре бар.
Күп кенә кулланучылар сайтка смартфоннардан керә, шуңа күрә төп менюда телефон трубкасы значогына басып, шунда ук шалтырату ясау мөмкинлегенә махсус басым ясала.
Элекке кебек үк, редакция материалларында ышаныч телефоны турында тулы мәгълүмат табарга була. Сорауларда һәм җавапларда аның эшчәнлегенең төп принциплары аңлатыла: психолог-консультантлар күрсәтә торган ярдәмнең аноним, конфиденциаль, түләүсез, квалификацияле булуы. Махсус менюда ярдәм сорап мөрәҗәгать итәргә уйлаучыларның төп сорауларына җавап бирүче мәкаләләр дә бар.
Сайтта шулай ук үз төбәгеңдә психологик хезмәтнең эш графигы турында мәгълүмат табарга һәм балалар ышаныч телефоны турында сорауларны чатта бирергә мөмкин.
Шулай ук сайтның яңартылган версиясендә «Еш очрый торган хәлләр» дигән яңа рубрика барлыкка килде, анда психолог балалар һәм яшүсмерләрнең сораулары белән бәйле аеруча актуаль кейсларны чишә.
«Өлкәннәргә» дигән махсус бүлектә балалар-ата-ана мөнәсәбәтләре коллизияләрен ачыкларга һәм гадәттән тыш хәлләрдә генә түгел, көндәлек кыенлыкларда да чыгу юлларын табарга ярдәм итүче материаллар тупланган.
Сайтның яңа версиясендә мәктәп психологлары, педагоглар һәм башка кызыксынган белгечләр өчен төрле һәм практик яктан файдалы материаллар «Медиа» бүлегендә тәкъдим ителгән.