ЯҢАЛЫКЛАР

ТР Президенты вазыйфаларын вакытлыча башкаручы Рөстәм Миңнеханов, Республика көне уңаеннан, бүген Казандагы “Корстон” комплексында  тантаналы кабул итү мәҗлесе уздырды.

Анда урта һәм кече бизнес, сәламәтлек саклау, белем бирү, ТРның дини даирә, яшьләр һәм яшьләр оешмалары, урман хуҗалыгы, экология хезмәте вәкилләре, хокук саклау, прокуратура, транспорт һәм юл төзелеше өлкәсендә, энергетика, газ һәм химия, нефть сәнәгате тармагында хезмәт куючылар, ТР муниципаль берәмлекләре арасында смотр-конкурс җиңүчеләре һ.б. - барысы 650дән артык кеше чакырулы иде. Шулай ук тантанада ТР Дәүләт Советы Рәисе Фәрит Мөхәммәтшин, ТР Премьер-министры Илдар Халиков, министрлыклар һәм ведомстволар җитәкчеләре дә катнашты.

Тантана Татарстан һәм Казанның казанышлары, ирешкән уңышларына багышланган ролик белән ачылды.

Бәйрәм чарасына килүчеләрне Рөстәм Миңнеханов бу вакыйга белән тәбрикләде. “Бүген Татарстан өчен иң зур бәйрәм — Республика көне. Бүген Татарстан һәм яңа Россиягә - 25 ел, - диде ул. – Сезгә тәкъдим ителгән бу ролик Татарстанның ничек, ни рәвешле үзгәрүен чагылдыра. Без 1990 нчы, 2000 нче елларны бик яхшы хәтерлибез һәм монда утыручы өлкәнрәк буын авыр чорларны узды, яшьләр исә Татарстан хәзерге вакытта Россиядә лидерлар рәтендә булсын өчен барысын да эшли, - диде ул һәм РФ Президенты Владимир Путинның республикага ярдәм итүен, Татарстанга хәзер авыр бурычлар куелуын, әмма ул бурычларның барысы да үтәлеп барылуын искәртте. – Бу республиканың мөмкинлекләрен-куәтен күрсәтә - ул сәнәгать, ресурслар һәм, әлбәттә, кеше потенциалы - сәләтле, булдыклы, максатчан кешеләр”, - диде республика лидеры һәм ил, Татарстан үсешенә зур өллеш керткән өчен залда утыручыларга рәхмәт белдерде.

Рөстәм Миңнеханов республика башкалардан ким була алмавын, әле киләчәктә зур эшләр башкарырга кирәк булачагын һәм Татарстанның кимчелекле яклары да юк түгеллегенә басым ясады. Әлеге мәсьәләләрнең системалы рәвештә чишелүен, Татарстанда 30 программа эшләвен дә искәртте ул. “Дөрес, бер көн эчендә генә барысын да үзгәртеп булмый. 25 ел элек, 10 ел элек без ничек яши идек, исегезгә төшерегез әле, - дип мөрәҗәгать итте Татарстан җитәкчесе һәм республикада булган эре сәнәгать оешмаларын санап, аларның партнерлары халыкара компанияләр булуын ассызыклады. – Бездә алдагы буын төзегән, авыр вакытларда сакланып калган нигез бар. Республика барысын да саклап кала алды. Безнең конфессияләр вәкилләренә дә рәхмәт белдерәсем килә. Тынычлык һәм үзара аңлашу ярдәмендә без шундый уңышларга ирешәбез. Без барыбыз да-  бер зур Россия гаиләсе”, - диде Рөстәм Миңнеханов.

Президент вазыйфаларын вакытлыча башкаручы чыгышыннан соң сәхнәдә Салават Фәтхетдинов “Мин яратам сине, Татарстан!” җырын башкарды. Шулай ук сәхнәдә Юрий Антонов, Алинә Шәрипҗанова, Филүс Каһиров, Айгөл Хәйри, Айдар Сөләйманов, Эльмира Кәлимуллина кебек танылган җырчылар, ТРның әйдәп баручы иҗат төркемнәре дә чыгыш ясады.

Казакъстан Президенты Нурсолтан Назарбаев, республиканың беренче Президенты, ТР Дәүләт Киңәшчесе Минтимер Шәймиевның Республика көне уңаеннан булган котлаулары да яңгыраш тапты.

“Хөрмәтле ватандашлар, кадерле дуслар! Татарстан халкының иң зур бәйрәме — Республика көне. Бу бәйрәмнең тарихы бик гыйбрәтле: 25 ел элек без үз өстебезгә күрелмәгән җаваплылык алдык һәм шушы юлдан хәзергәчә лаек барабыз, - диелгән иде М. Шәймиев котлавында. – Иң мөһиме — республика җитәкчелегенең аның күп милләтле халкын берләштерү, мәнфәгатьләрен кайгырту, тормыш сыйфатын яхшырту. Бу безнең тиңсез байлыгыбыз. Республика казанышларында сезнең өлешегез олы рәхмәткә һәм тирән ихтирамга лаек”.

Татарстан Президенты вазифаларын вакытлыча башкаручы Рөстәм Миңнеханов бүген "Kazan City Racing - 2015" автоспорт тамашасында булды. Әлеге чара Казан Кремле янында Меңьеллык мәйданы буенда үткәрелгән махсус трассада узды. Рөстәм Миңнехановны ТР Премьер-министры Илдар Халиков, ТР Президенты Аппараты җитәкчесе Әсгать Сәфәров, Казан мэры Илсур Метшин, министрлыклар һәм ведомстволар вәкилләре озата йөрде, дип хәбәр итә ТР Президенты матбугат хезмәте.

Искәртеп узабыз: "Kazan City Racing" беренче мәртәбә 2014 елда үткәрелде. Быел әлеге чара Республика көнен бәйрәм итү кысаларында уздырылды. Рөстәм Миңнеханов Россиянең атаклы дрифтерларының күрсәтмә чыгышларын карады. Тамашачылар алдында "Ле-Ман сәгате" тәүлек буе үткәрелә торган марафонда LMP1 югары дәрәҗәсендә катнашкан Марк Шульжицкий чыгыш ясады. "Nissan Nismo" пилотының "Nissan GT-R" суперкарында чыгышы иң кызыклысы булды. 

Чараның көтеп алынган төп мизгеле "Формула-1 Infiniti Red Bull Racing" командасы йөртүчесе Даниил Квят күрсәтмә чыгышы булды. Спортчы  берничә мәртәбә болидта әйләнеп чыкты, шуннан күп санлы кунакларны сәламләде. 

Татарстанның "КАМАЗ-Мастер" командасы да трюклар күрсәтте. Күрсәтмә дрифттан башка спортчылар 9 тонналы авыр йөк машинасында трамплиннан сикерделәр: "КАМАЗ" автомобиле 20 метрга бик уңышлы "очты". 

Аннары Рөстәм Миңнеханов "Камаз-Мастер" командасы боксында булды. Спортчылар Казанга өч автомобиль алып килгән, аларның икесе "Дакар" раллиенда җиңгән. Моннан тыш, газ ягып йөри торган двигательле авыр йөк машинасын да күрсәтелде. 

Шулай ук ТР Президенты вазифаларын вакытлыча башкаручы Горький автозаводының "ГАЗ Рейд Спорт" командасы, "RWT-Motorsport" шоссе-боҗра узышы буенча Россия командасы һәм "Формула-1 Infiniti Red Bull Racing" боксында да булды.   

 Татарстан Президенты вазифаларын вакытлыча башкаручы бүген Республика көне уңаеннан оештырылган тантаналарда катнашы, ул "Kazan-Arena" стадионы янындагы төп концерт мәйданчыкларының берсендә булды. Сәхнә каршындагы мәйданда ТР лидеры котлавын Казанның меңләгән кешесе һәм башкала кунагы ишетте.

"Сезне иң төп бәйрәмнәребезнең берсе - Республика көне белән котлыйм. Без башкалабыз һәм бөтен республиканың ничек үзгәрүен күрәбез. Биредә зур күләмле чаралар үткәрелә: күптән түгел генә спортның су төрләре буенча дөнья чемпионаты тәмамланды. Яңа объектлар төзелә. Хәзер бөтен республикада Парклар һәм скверлар елы бара - бу безнең яшәү мохитебез бит", - диде ТР Президенты вазифаларын вакытлыча башкаручы.

"Безнең киләчәккә планнар зур һәм без сезгә таянабыз. Бәйрәмебез күңелле үтсен!" - дип өстәде Рөстәм Миңнеханов бәйрәмгә җыелучыларга мөрәҗәгать итеп.

"Kazan-Arena" янында узган концертта бөтен республикадан иҗат коллективлары, шулай ук Россия эстрадасы йолдызлары - җырчы Юрий Антонов һәм «А-Cтудио» төркеме катнаша. 

Бүген Яшел Үзәндә "Киләчәк" ("Будущее") балалар бакчасы ачылды. Аны ачу тантанасында ТР Президенты вазифаларын вакытлыча башкаручы Рөстәм Миңнеханов, Яшел Үзән районы башлыгы, Яшел Үзән мэры Александр Тыгин, ТР мәгариф һәм фән министрының беренче урынбасары Андрей Поминов һ.б. катнашты.

Яңа балалар бакчасы 260 урынга исәпләнгән, февральдән алып августка кадәр барган төзелеш бәясе 140 млн сум тәшкил иткән. Анда 13 төркем эшлиячәк. Биредә музыка һәм спорт заллары, логопед бүлмәсе, татар теле төркеме, балалар бакчасы территориясендә 10 спорт-уеннар мәйданчыклары һ.б. бар. Моннан тыш, балалар бакчасында балаларның инженер-техник сәләтен ачу буенча "Космик разведчик" проекты чынга ашырылачак.

Методика һәм программа эшләү белән шөгыльләнгән Казанның 35 нче мәктәбендәге Аэрокосмик белем бирү үзәгенең космик юнәлеш җитәкчесе Игорь Григорьев сөйләвенчә, ул программа 4-7 яшьлек балаларга исәпләнгән. "Программаның максаты шунда ки, шул яшьтә балалардагы сәләтләрне ачу һәм үстерү мөмкинлеге бирүче программа төзелә. Без балалар техник яктан үсеш ала башлый торган балалар бакчасы ачтык, - дип сөйләде Игорь Григорьев. – Балалар астрономия белән кызыксынуларын чынга ашыра, инженер әзерлеге уза, модельләр ясарга, радиоэлектрониканы, робототехниканы өйрәнә алачак".

"Бүген шәһәр тарихында истәлекле вакыйга - мондый зур балалар бакчалары сирәк ачыла. Ике елда бу зур, матур һәм инновацион дүртенче балалар бакчасы, - диде Рөстәм Миңнеханов. - Нигездә, кеше 7 яшькә кадәр формалаша, шуңа күрә 3 яшьтән алып 7 яшькәчә - балалар үсеше өчен максималь дәрәҗәдә кулланыла торган чор".

Республикада мәгариф системасына һәм матди-техник базасына зур игътибар бирелә, дип ассызыклады ТР Президенты вазифаларын вакытлыча башкаручы. Быел 75 балалар бакчасы төзелде, дип искәртте ул. "Алар барысы да дөньякүләм дәрәҗәдә. Киләчәктә көндәшлелеккә сәләтле булу өчен безнең балалар барлык бүгенге таләпләргә туры килер дип уйлыйм", - диде Р.Миңнеханов. Шулай ук, 253 бала балалар бакчасына алынган, дип белдерде ул.

Иң мөһиме - сез тәрбияләүнең югары стандартларын куйгансыз, дип ассызыклады Р.Миңнеханов.

Татарстан Республикасы Президенты вазифаларын вакытлыча башкаручы Рөстәм Миңнеханов бүген Яшел Үзән районына эш сәфәре кысаларында биредәге психоневрология интернатының эшчәнлеге белән танышты. Аны Татарстан Республикасы хезмәт, эш белән тәэмин итү һәм социаль яклау министры Эльмира Зарипова, Татарстан Республикасы Президенты ярдәмчесе Ләйлә Фазлыева, Татарстан Республикасы Дәүләт Советы Рәисе урынбасары Юрий Камалтынов, Яшел Үзән муниципаль районы башлыгы Александр Тыгин һәм башкалар озата йөрде.

Учреждение 2006 елда ачылган. Бүген монда 540 пациент бар, эшче персонал - 204 кеше (табиблар һәм педагоглар). Интернатта тернәкләндерү буенча зур эш алып барыла. Тернәкләндерү барышында медикаментоз терапия, дәвалау физкультурасы, шәхси һәм төркем психотерапиясе, социаль реабилитация технологияләре, хезмәт терапиясе кулланыла.

Рөстәм Миңнеханов торак һәм дәвалау бүлмәләрен карап чыкты. Интернатта 3 торак корпус урнашкан. Барысы 111 бүлмә бар. Шулай ук Татарстан Республикасы Президенты вазифаларын вакытлыча башкаручы тегү һәм балта эшләре остаханәләрен карады.

Рөстәм Миңнехановка хәбәр ителгәнчә, пациентларга хезмәт күрсәтү өчен стоматология, процедура, физиотерапия кабинетлары, чәчтарашханә, 150 урынлык актлар залы, китапханә, тренажер залы һәм башкалар бар.

ТР Президенты матбугат хезмәте шул хакта белдерә.

Татарстан Республикасы Президенты вазифаларын вакытлыча башкаручы Рөстәм Миңнеханов бүген Казанда «Салават күпере» торак комплексында булды.

Рөстәм Миңнехановны Казан мэры Илсур Метшин һ.б. рәсми затлар озата йөрде.

Торак комплексының төзелеш мәйданчыгында Рөстәм Миңнеханов өчен кыскача презентация уздырдылар, шул чакта торак комплекс кварталлары турында, торак фонды күләме турында, торакны гамәлгә кертү сроклары турында сөйләделәр.

Ел азагына кадәр кайбер йортларны файдалануга тапшыру күз алдында тотыла, бүгенге көнгә төзелеш тәмамлану стадиясендә, дип хәбәр иттеләр Рөстәм Миңнехановка төзелеш алып баручы компанияләр вәкилләре. Торак комплекста шулай ук социаль инфраструктура объектлары – балалар бакчалары һәм гомуми белем мәктәпләре төзелә.

Рөстәм Миңнехановка инженерия челтәрләрен тоташтыруның барышы турында сөйләделәр. Комплекс йортларының берсендә Татарстан Республикасы Президенты вазифаларын вакытлыча башкаручы һәм аны озата йөрүче затлар эчке эшләр тәмамланган бер фатирны карап чыктылар, дип хәбәр итә ТР Президенты матбугат хезмәте.

Искәртәбез: «Салават күпере» торак комплексы – эконом-класс рәвешендәге зур торак проекты, ул Казанның Киров районында төзелә, мәйданы - 360 га. Торак комплексы «Татарстан Республикасы Президенты каршындагы Дәүләт торак фонды» коммерцияле булмаган оешма механизмнары аша алып барыла.

Фотосурәт prav.tatarstan.ru сайтыннан алынды.

Татарстанда  2015 елда күп фатирлы торак йортларга капиталь ремонт программасы буенча 999 объектның 930ында эшләр тәмамланган. 69 йортта эшләр  31 августка төгәлләнергә тиеш.

Бүген бу хакта ТР Хөкүмәте йортында узган республика киңәшмәсендә ТР төзелеш, архитектура һәм ТКХ министры Ирек Фәйзуллин хәбәр итте. Киңәшмәне барлык мунициципаль районнар белән видеоконференция режимында ТР Президенты вазифаларын вакытлыча Рөстәм Миңнеханов уздырды.

Искәртеп үтәбез: Рөстәм Миңнеханов бүген Лениногрскига эш сәфәре кыла, ул шуннан торып киңәшмә үткәрә.

Киңәшмәдә видеоконференция режимында ТР Хөкүмәте йортыннан Татарстан Премьер-министры Илдар Халиков та катнашты.

Ирек Фәйзуллин хәбәр иткәнчә, Дәүләт торак инспекциясе  күп фатирлы 216 торак йортны кабул итеп алды. ТР төзелеш, архитектура һәм ТКХ министры сүзләренчә, капремонтның уртача республика дәрәҗәсеннән Казан шәһәре, Югары Ослан, Кукмара, Яңа Чишмә артта калып бара. Ул шулай ук искә төшергәнчә, 2015 елның 15 сентябренә кадәр капремонт эшләре барлык районнарның барлык объектларында да тәмамланырга тиеш. ТР Президенты вазифаларын вакытлыча башкаручы, үз чиратында, районнар җитәкчеләрен күп фатирлы торак йортларга капиталь ремонт барышын тикшереп торырга, билгеләнгән срокларда төзелешне тәмамларга өндәде.

Аннары Ирек Фәйзуллин мәктәпләргә капремонт эшләре турында белешмә бирде. 86 мәктәптә капремонт эшләре тулысынча төгәлләнгән, 33 объектта эшләр дәвам итә әле. 21 августка гомуми белем мәктәпләре буенча акчаларны үзләштерү 98,8 процентны тәшкил итә.

Көллиятләргә капиталь ремонт кысаларында эшләр 3 объектата тәмамланган (Яшел Үзән, Лаеш һәм Түбән Кама районнары), калган 6 объектта эшләр дәвам итә.

ТР төзелеш министры шулай ук авылларны су белән тәэмин итүне яхшырту программасы турында да сөйләде. Бүгенгә 286,4 км суүткәргеч уздырылган, 35тән 33 скважина борауланган, 40 су җыю каланчасы урнаштырылган, Әтнә, Югары Ослан һәм Минзәлә районнарында 32 су җыю каланчаларын кую эше дәвам итә, эшләрне төгәлләү срогы – 2015 елның 10 сентябре.

Авыл районнарында ут баганалары урнаштыру программасы шулай ук график буенча бара. Бүгенгә 11 мең 702 диодлы яктырткыч куелган (100 процент); 641 электр энергиясен исәпкә алу щиты урнаштырылган (100 процент); 390 км электрүткәргеч линиясе монтажланган (100 процент).

Ирек Фәйзуллин хәбәр иткәнчә, җылылык сезонына әзерлек бара. Социаль-мәдәни өлкә объектлары 92,1 процентка әзерләнгән, коммуналь инфраструктура объектлары уртача – 90 процент. Күп фатирлы йортлар фондында җылылык сезонына әзерлек 15 муниципаль районында тулысынча төгәлләнгән. Барлык социаль объектлар да 9 районда әзерләнгән инде – Әгерҗе, Апас, Балтач, Буа, Биектау, Лаеш, Саба, Тукай һәм Теләче районнарында. Чирмешән һәм Саба районнарында эшләр артта калып бара.

Ирек Фәйзуллин шулай ук Татарстанда «Парклар һәм скверлар» программасын гамәлгә ашыру турында сөйләде. Барлык 140 объектта эшләр башланган, шулардан 26 объектта эшләр тәмамланган инде. Үтәлеш – 81 процент. Ирек Фәйзуллин искәрткәнчә, программаны Татарстан бюджетыннан финанслау 2015 елда 1 млрд сум тәшкил итә. Җирле бюджетлардан һәм бюджеттан тыш чыганаклардан 500 млн сум көтелә. Расланган исемлектәге 75 объект өр-яңадан төзелә, 65 объектка капиталь ремонт ясала. Ирек Фәйзуллин искәрткәнчә, хәзерге вакытта 2016 елга төзелеш программалары буенча объектлар исемлеген формалаштыру эшләре төгәлләнеп килә. 2016 елда 34 программаны гамәлгә ашыру планлаштырыла, дип хәбәр итә ТР Президенты матбугат хезмәте.  

Россия Гадәттән тыш хәлләр министрлыгы Донбасс өчен гуманитар ярдәм төялгән исәбе буенча 37нче автоколоннаны әзерләүгә кереште. Яңа уку елы алдыннан  йөкнең зур өлешен дәреслекләр тәшкил итә, дип тапшыра ТАСС.

Чираттагы колонна составына керәчәк 40тан артык автомбиль 07.00дә Мәскәү өлкәсеннән Ростов өлкәсенә юл алган. Алар Донбасс укучылары һәм студентлары өчен РФ Мәгариф министрлыгы биргән 700 тонна дәреслек алып бара.

Россия Гадәттән тыш хәлләр министрлыгының Дон коткару үзәгендә Ногинск автомобильләренә башка төбәк машиналары да кушыла. Колонна 1,2 мең тоннадан артык гуманитар ярдәм илтер дип планлаштырыла.

Йөк составына, дәреслекләрдән тыш, 500 тоннадан артык азык-төлек - ярма, он, чәй һәм консервалар да керә.  

Дүшәмбе көнне нефтькә дөнья бәяләре 2 проценттан артыкны югалтып, тискәре динамика күрсәтә; 2009 елның 17 мартыннан беренче тапкыр Brent маркалы нефтьнең бер барреле, Кытай икътисады өчен борчылулар фонында, 45 доллардан да түбән төшкән, дип белдерә "Новости" РМА.

Мәскәү вакыты белән 07.07дә WTI җиңел нефтенә октябрь фьючерслары 2,52 процентка, барреле 39,44 долларга кадәр төшкән. Brent маркалы Төньяк диңгез нефтенә октябрь фьючерслары 2,09 процентка  - барреле 44,51 долларга кадәр кимегән.

Дүшәмбе көнне хакимиятнең пенсия фонды акчаларын акцияләргә салуны рөхсәт итүенә карамастан, Шанхай фонд биржасы индексы 8 проценттан артыкка төшкән. Кытай икътисады өчен борчылулар инвесторларны Азиянең башка икътисадлары да үсешен киметер дигән уйга сала, ә бу нефтькә ихтыяҗ белән бәйле вәзгыятьне какшатачак.